ചുമർച്ചിത്രം

മാരിൻ സൊരെസ്കോ

റൊമേനിയ

നരകത്തിൽ പാപികളെ
പരമാവധി ഉപയോഗപ്പെടുത്തും

ചവണകൊണ്ട് ബ്രൂച്ചുകളും മുടിപ്പൂക്കളും മോതിരങ്ങളും
ചണത്തുണിയും കിടക്കവിരികളും പെണ്ണുങ്ങളുടെ തലയിൽ നിന്നു വേർതിരിച്ചെടുക്കും
എന്നിട്ടവരെ തിളക്കുന്ന കുട്ടകങ്ങളിലേക്ക് എറിയും
ഗന്ധകം തിളച്ചുമറിഞ്ഞു പുറത്തേക്കൊഴുകുന്നുണ്ടോ
എന്നു ശ്രദ്ധിക്കാനായി

പിന്നെ ചിലർ അത്താഴപാത്രങ്ങളായി
പാകപ്പെടും
അതിൽ അടിത്തൂൺ പറ്റിയ പിശാചുക്കളുടെ വീടുകളിലേക്ക്
ചൂടൻ പാപങ്ങൾ നിറച്ച്‌ കൊടുത്തുവിടും

ആണുങ്ങൾ ആണ് കനപ്പെട്ട ജോലിക്ക് നിയോഗിക്കപ്പെടുക
തലമുടിയധികമുള്ളവരെ അതിൽ നിന്നൊഴിവാക്കും
അവരെ പുതുമവിടാതെ നൂറ്റെടുത്ത്
ചവിട്ടികളാക്കി മാറ്റും